Breytingar á stjórn og Valborg útnefnd heiðursfélagi
Aðalfundur Verkalýðsfélagsins Hlífar var haldinn í gær. Á fundinum var ársreikningur fyrir árið 2024 afgreiddur, auk þess sem breytingar urðu á stjórn.
Rekstur félagsins gekk afar vel á árinu. Í ársreikningi kemur m.a. fram, að rekstrarafgangur ársins 2024 hafi numið 257 milljónum króna. Eigið fé félagsins er 2.384 milljónir króna og eiginfjárhlutfall 94%. Engar langtímaskuldir eru hjá félaginu. Eignir félagsins eru 2.545 milljónir króna.
Iðgjöld ársins numu tæpum 700 milljónum króna, samanborið við 613 milljónir árið áður. Rekstrargjöld voru 660 milljónir, samanborið við 530 milljónir árið 2023. Munar þar mestu um umtalsverða aukningu útgjalda sjúkrasjóðs, einkum vegna sjúkradagpeninga.
Breytingar á stjórn
Í janúar voru greidd atkvæði samkvæmt B-lið laga, þ.e. varaformaður, tveir meðstjórnendur og þrír varamenn. Gundega Jaunlinina var endurkjörin varaformaður til tveggja ára. Meðstjórnendur voru kjörin Sigríður Þorleifsdóttir og Guðmundur Þorleifsson. Varamenn í stjórn voru kjörin Krystian Sipowicz, Berþóra Þorsteinsdóttir og Pétur Ólafsson. Bergþóra og Pétur eru ný. Úr stjórn gekk Aðalsteinn Einar Stefánsson. Honum eru þökkuð góð störf.
Valborg útnefnd heiðursfélagi
Valborg Óskarsdóttir, sem flestir þeir sem hafa átt erindi við skrifstofu félagsins undanfarna áratugi þekkja af góðu, lét af störfum hjá félaginu um síðastliðin mánaðamót. Stjórn félagsins ákvað einróma að gera Valborgu að heiðursfélaga. Valborg hóf störf hjá félaginu árið 1. september 1995. Hinn heiðursfélaginn, Kolbeinn Gunnarsson fyrrum formaður, hóf störf 2. maí sama ár.
Í ávarpi sem formaður félagsins, Eyþór Þ. Árnason, flutti á fundinum, sagði hann meðal annars:
Eftir nokkrar vikur eru 30 ár frá því að Valborg hóf fyrst störf fyrir félagið. Á þeim tíma hefur félagið tekið stórfelldum breytingum. Allan þennan tíma hefur Valborg staðið vaktina, tekið að sér ný verkefni eftir þörfum, tileinkað sér ný vinnubrögð og nýja tækni.
Næstum allan þennan tíma hefur hún verið andlit félagsins gagnvart þeim sem hafa þurft að leita til þess, sækja um styrki, fá orlofshús, eða sækja aðra þá fyrirgreiðslu sem félagið hefur veitt á hverjum tíma.
Ég held að ég geti leyft mér að fullyrða, að enginn hefur haft bein, persónuleg samskipti við fleiri félagsmenn en Valborg. Ég ætla líka að leyfa mér að fullyrða að aldrei hefur einn einasti félagsmaður kvartað undan viðtökunum. Valborg hefur alltaf lagt sig fram um að leysa hvers manns vanda.
Auk þess að vera útnefnd heiðursfélagi, var Valborg sæmd gullmerki félagsins. Verkalýðsfélagið Hlíf og félagsmenn þess standa í þakkarskuld við Valborgu og óska henni velfarnaðar í hverju því sem hún tekur sér fyrir hendur.